Rom 14 | SWP | STEP | Ia sunuma arinai i beruberu, au oiamiyama au awaehaei, na tabu bena au haiawayagara.

Romans 14

1 Ia sunuma arinai i beruberu, au oiamiyama au awaehaei, na tabu bena au haiawayagara. 2 Paana tau esau ena sunuma eai i ene ginauri gamagamagari abo i aidi, tau esau i beruberu, arinai sarai i dabudabu. 3 Tau aiai wa taudabudabu tabu i isugaraei, eo taudabudabu wa tauaiai tabu i hegiru. Paana Eaubada ia tau wa i oiamiyama. 4 Oa eai tau esau ena tauheaheari u hetala? Ia ana tanuaga mamohoi matana eai i toro e i beu. Mamohoi abo se hetorodidini, Eaubada ia hetorona abina ie ata.

5 Tau esau i ene asubena esau i sae ariri, tau esau enaba asubena gamagamagari gonogonoadi mo. Tatao gamagamagaridi tau esau, eo tau esau, isibom edi nuatu se nuatudidini. 6 Ia asubena wa i hetabuei, Guiau arinai i hetabuei; ia asubena nige i hetabuei hinage Guiau arinai nige i hetabuei. Tauaiai Guiau arinai i aiai paana Eaubada i lautoiei; tau dabudabu Guiau arinai i dabudabu, eo Eaubada hinage i lautoiei. 7 Paana nige tau esau arida eai iabom ena mauri i mauriei, eo nige tau esau iabom ena mate i matei. 8 Ena ta maumauri, Guiau arinai ta mauri; eo ena ta mamate, Guiau arinai ta mate. Arinai ta mauri, ta mate, ita Guiau enanayao. 9 Paana hesabana ede Keriso ie mate, eo i toro, eo i maurio tatao matematedi eo tatao maumauridi ia bena edi Guiau eai i lau.

10 Ue saha em tau u hegiru? Ue saha em tau u isuewaei? Paana ita gamagarida abo ta toro Keriso ena aba‐lauhetala abababawana matana eai. 11 Doha se uriyao si ene, “Guiau ie riba, doha eau ma‐maurigu ede, turidi gamagamagari abo se turibono nuanuagu eai, eo memenadi gamagamagari Eaubada abo se wasawasaei.” (Is. 45.32.) 12 Ita gamagarida, tau esau eo tau esau, Eaubada arinai eda laulau abo ta wasawasaedi.

13 Arinai tabu ita ta haiheduduraiuioida, na teina eda abahedudurai mo ta nuatui, ita tabu aba‐alabesibesi eo abaheguri esau ta tore eda tau esau ena eda eai. 14 Ea nuatui, eo Guiau Iesu i henuatuigu, nige ginauri esau i bii gaibu; ia mo ena nuatu eai i ene ginauri ie bii, iaede arinai ie bii ede. 15 Na ena em tau am aiai arinai u henuabaaea, meta nige gadosisi laulauna. Ia debana eai Keriso ie mate wa, am aiai eai tabu u hebaaea. 16 Em lolo tabu se awa‐baaeaei, 17 paana ede Eaubada ena basileia aiai nige’e, eo nomnom nige’e, na laulau‐dudurai mo eo loni, eo kode Earua Tabuna boeana eai. 18 Ia teina ginauri ta aridi eai Keriso i heayaiei Eaubada ia i nualoloei, eo tatao hinage ia se awaloloei. 19 Loni abahetubuna abiabina ita hesabana ta laulau, eo ginauridi hinage aridi eai tatao ta hesibasibadi. 20 Aiai sabina Eaubada ana paisoa tabu u hetatagorigori. Mamohoi ginauri gamagamagari se aa, ia mo tauaina ena i ene se baaea, ia arinai abo se hemala baaea. 21 I lolo sarai u otaotaei, eo waina hinage u otaotaei, eo laulau saha eo saha u otaotaedi, ata debadi eai em tau u healabesibesi, eo u heberuberu. 22 Sunusunumam oabom nuaboeam eai u abididini, Eaubada matana eai; tau wa i lolo ede ena ia nuana nige i hegiruuioi, ena abiabi e saha eo saha i aiaini, debadi eai. 23 Na ia nuana i labulabui, ena i aiai abo ana giru, paana sunuma mo debana eai nige i aiai; laulau aisana eo aisana nige sunuma eai se tubuma, isi baaeadi ede.